27. marts 2000 UPA 2000/09
Nassuiaatit nalinginnaasut
Ullup Namminersornerullutik Oqartussat aningaasanut inatsisaata akuersissutigineqarfiata kingusinnerpaamik novembarip aallaqqaataaniit decembarip aallaqqaataa nallertinnagu akuersissutigineqartartussanngorlugu allanngortinneqarnissaanik siunnersuut isigineqartariaqarpoq Inatsisartut suleriaasiata allanngortinneqarnissaa naatsorsuutigineqartoq aallaavigalugu, tassami allanngortitsinikkut ukiakkut ataatsimiinnerup aallartittarfia ullunik 14-it tikillugit kinguartinneqassaaq. Ukiakkulli ataatsimiinneq sivitsorneqartussatut naatsorsuutigineqanngimmat aningaasanut inatsisip akuersissutigineqarfissaa aamma taamaaqataanik kinguartinneqartariaqarpoq.
Oqaatigineqassaaq kommunit missingersuutaat decembarip aallaqqaataa nallertinnagu akuersissutigineqartartussaammata. Ulloq akuersivissaq ataasiusussanngormat, missingersuutit suliarineqarneranni kommunit suleqatigilluarneqarnissaat suli pisariaqarnerulissaaq. Tamatumani suliarineqartartut tassaapput Namminersornerullutik Oqartussat kommuninut ataatsimoortumik tapiissutaat pillugit isumaqatigiissutit, kiisalu sanaartugassanut isumaqatigiissutit. Kingulliullugu taaneqartumi suliassaqarfiit qassiit aningaasalersorneqarnerat kommuninit aammalu Namminersornerullutik Oqartussanit avinneqartarput.
Ilanngullugu oqaatigineqassaaq oqaasiortaliornera kingusinnerpaamik xx. qaammat siunnersuutigineqarmat allanngortinneqassasoq imaalillugu xx. qaammat nallertinnagu, taamaalilluni oqaasertaliornerit assigeerluinnaat atorneqartassallutik Isertitanit akileraarutit pillugit Inatsisartut inatsisaanni Nunatta karsianut akileraarutissat angissusissaasa aalajangertarnerannut tunngatillugu, kiisalu kommuninut akileraarutissat akuersissutigineqartarnerannut tunngatillugu.
KANUKOKA tusarniaanernut akissummini nalunaarpoq piffissap aningaasanut inatsisip akuersissutigineqartarfissaa kommunillu namminneq missingersuutiminnik akuersissuteqartarfissaa qaleriilersillugit piffissaliussap allanngortinneqarnissaanik siunnersuut kommunit arlallit eqqarsarnartoqartikkaat.
Naalakkersuisulli isumaqarput missingersuusiornerup ingerlanerani kommunit peqatigalugit pitsaasumik ataqatigiissaarinikkut kommunit missingersuusiornerannut ajoqutaanngitsumik ingerlatsisoqarsinnaanera qularnaarneqarsinnaasoq.
Siunnersuutip allaffissornikkut imaluunniit aningaasaqarnikkut kinguneqarnissaa naatsorsuutigineqanngilaq.
Aalajangersakkanut ataasiakkaanut nassuiaatit
§ 1-imut
Piffissaliussap "kingusinnerpaamik 1. novemberimiit" "1. december nallertinnagu" kinguartinneqarnissaa siunnersuutigineqarpoq.
§ 2-mutSiunnersuutigineqarpoq Inatsisartut inatsisaat 1. juni 2000 atuutilissasoq, taamalu 2001-imut Aningaasanut Inatsisissatut siunnersuutip akuersissutigineqarneranut atuuttussanngorluni.